ഞാനൊരു പാവം പാലാക്കാരന്‍

ബാംഗ്ലൂര്‍ ഡൈയ്സ്1 Park

>> Saturday, August 30, 2008

പഠനമൊക്കെ കഴിഞ്ഞ് ആദ്യത്തെ ബോംബെ തെണ്ടലും കഴിഞ്ഞാണ് ബാംഗ്ലൂരില്‍ ശിപാര്‍ശയിലൂടെ ജോലി
ലഭിക്കുന്നത്. എന്താ‍യാലും ജോയിന്‍ ചെയ്തു. എന്നെക്കാളും മുമ്പെ അവിടെത്തി പഠനം നടത്തിക്കൊണ്ടിരുന്ന കസിന്‍ എല്ലാ സഹായങ്ങളും ചെയ്തു തന്നു. കൂടെ ജോലി ചെയ്യാന്‍ അന്നു മലയാളികളില്ലത്തതിനാല്‍ ഒറ്റക്കു തമസിക്കനുള്ള മടി കാരണം കസിന്റെയും കൂട്ടാളികളുടെയും കൂടെ കൂടാം എന്നു തീരുമാനിച്ചു. കാര്യം ഗള്‍ഫുകാരുടെയും മറ്റും മക്കളാണെങ്കിലും കൂടെയൊരു ശംബളക്കാരന്‍ ഉണ്ടെങ്കില്‍ അത്യാവശ്യം കടം വാങ്ങാമല്ലോ എന്നവരും വിചാരിച്ചു കാണണം.

പഴയൊരു ബില്‍ഡിങ്ങിലെ മൂന്നാം നില. എന്നു വെച്ചാല്‍ അവിടെ 2 കൊച്ചു മുറികളുള്ള ഒരു ഫ്ലാറ്റ് എന്നോ, മുറികള്‍ എന്നോ ഒക്കെ പറയാവുന്ന ഒന്ന്. പിന്നിത്തിരി ടെറസ്. രാജാജി നഗറിലെ മോഡി ജംക്ഷനിലുള്ള 790 എന്ന വീട് പുതുക്കി പണിയുന്നതിനാലാണ് താല്‍കാലികമായി ഇതെടുത്തിരിക്കുന്നതു എന്ന് കസിന്‍ പറഞ്ഞു. കാര്യം ചെറുതും പഴയതും ഒക്കെയാണെങ്കിലും 5-6 തടിമാടന്‍ പിള്ളേര്‍ താമസിക്കുന്ന ഇത്തിരി ഒച്ചയും അനക്കവും ഉള്ള ഒരു വീട്.

വന്ന അന്നു രാവിലെ തന്നെ കുളിച്ചു ഫ്രെഷ് ആയി കസിന്റെ കൂട്ടുകാരന്റെ ബൈക്കുമെടുത്തു കസിനെകൂട്ടി
ഇലക്ട്രോണിക് സിറ്റിക്കു വച്ചു പിടിച്ചു. അവിടെ ചെന്നു, ജോയിന്‍ ചെയ്യുന്ന ഫോര്‍മാലിറ്റീസ് ഒക്കെ നടത്തി. കസിന്‍ പഴയ ഇംഗ്ലീഷ് മീഡിയവും പിന്നെ 1 വര്‍ഷത്തെ ബാംഗ്ലൂര്‍ എക്സ്പീരിയന്‍സും ഉള്ള ആളായതിനാല്‍ എന്റെ ഇംഗ്ലീഷില്‍ കഷ്ടപ്പേടേണ്ടിവന്നില്ല. തിരിച്ചു വന്നപ്പോള്‍ അടുക്കളയിലും ബാത്ത് റൂമിലും ഒക്കെ തിരക്ക്, ഭക്ഷണം ഉണ്ടാക്കും കുളിയും നനയും ഒക്കെ ആയിരിക്കും. ഇന്നെന്താ ക്ലാസ് ഇല്ലയോ അവോ?

ഒരു റൂം ബെഡ് റൂം. അതില്‍ 4-5 ബെഡ്ഡുകള്‍ നിലത്തു നിരത്തി വിരിച്ചിരിക്കുന്നു. വില കൂടിയ ബ്ലാങ്കെറ്റുകള്‍ എണീറ്റു പോയപ്പോള്‍ കാലുകൊണ്ടു തോണ്ടി അരുകിലേക്കു മാറ്റി വെച്ചിരിക്കുന്നു. തലയിണകളില്‍ പലതരത്തിലുള്ള ഡിസൈനുകള്‍, ഓരോരുത്തരുടെ ഉമിനീരിന്റെ ഉറവ അനുസരിച്ചായിരിക്കാം. സൈഡുകളില്‍ ഓരോരുത്തരുടെ സാംസോണൈറ്റ് തുടങ്ങിയ ഫോറിന്‍ പെട്ടികള്‍. ഒരു വശത്തുള്ള നീണ്ട അയയില്‍ എല്ലാവരുടെയും ഷര്‍ട്, പാന്റ്, T-ഷര്‍ട് തുടങ്ങിയ സാധനങ്ങള്‍ ഒന്നിച്ചിട്ടിരിക്കുന്നു. എല്ലാം നല്ല കമ്പനികളുടെ തന്നെ. അതിനു താഴെയായി നിരനിരയായി ധാരാളം ആണികള്‍, അതിലാണ് ഓരോരുത്തരും അടിവസ്ത്രങ്ങള്‍ തൂക്കിയിരിക്കുന്നത്. മുകളില്‍ കിടക്കുന്ന സാധനങ്ങളുടെ ക്വാളിറ്റി താഴെകിടക്കുന്നവക്കില്ല. ഉറുമ്പിന്റെ ശല്ല്യവും ഉണ്ടെന്നു തോന്നുന്നു. അടുത്ത മുറിയില്‍ തീവ്രവാദികളുടെ റൂമിലെന്ന AK 47 പോലെ നിരനിരയായി തൂക്കിയിട്ടിരിക്കുന്ന മിനി ഡ്രാഫ്റ്ററുകള്‍. കാര്യം എല്ലാവരും ബീഡിയാണു വലിക്കുന്നതെങ്കിലും ജനല്‍ പടികളില്‍ ഭംഗിയായി അടുക്കി വെച്ചിരിക്കുന്ന വിത്സിന്റെ കൂടുകള്‍. ഒരു മേശ, 3-4 കസേര, പിന്നെ ഒരു കെട്ടു ഷൂസും. അടുക്കളയില്‍ ഇപ്പോളും തിരക്കു തന്നെ, പക്ഷെ കുളിമുറിയില്‍ 2-3 പേരുകൂടിയാണോ കുളിക്കുന്നത്? എന്തു പണ്ടാരം എങ്കിലും ആവട്ടെ. മുറിക്കകത്തിരിക്കാന്‍ ഒരു വീര്‍പ്പുമുട്ടല്‍. ഞാന്‍ ടെറസില്‍ വന്നു അരമതിലില്‍ ഇരുന്നു.

താഴേക്കു നോക്കുമ്പോള്‍ നമ്മുടെ ബില്‍ഡിങ്ങിനോടു ചേര്‍ന്നു ഒരു തോട്, അഴുക്കു ചാല്‍ എന്നു പറയാം. ഇത്തിരി ചെരിഞ്ഞിരുന്നു, അപ്പോള്‍ അഴുക്കുചാല്‍ കാണാനില്ല, പാര്‍ക്കിലെ മനോഹരമായ പച്ചപ്പും, ചുവപ്പും മഞ്ഞയും നിറത്തിലുള്ള പൂക്കളും മാത്രം ധൃഷ്ടിപഥത്തില്‍. ചെറിയ തണുപ്പും നിറയെ നിറങ്ങളുമുള്ള സുഖകരമായ അവസ്ഥ.

എടാ ഇങ്ങോട്ടു വാടാ... തിരിഞ്ഞു നോക്കിയപ്പോള്‍ കസിന്‍ വിളിക്കുന്നു. കാര്യം 2 വയസ് ഇളയതാണേലും ചേട്ടാന്നു പോയിട്ടു പേരു പോലും വിളിക്കില്ല. എന്തിനേറെ പറയുന്നു 4 വയസിനിളയ അനിയനു പോലും എടാ എന്നല്ലാതെ എന്നെ വിളിക്കാന്‍ തോന്നില്ല. എന്നെ കണ്ടാല്‍ ആര്‍ക്കും എടാ എന്നു വിളിക്കാന്‍ തോന്നും എന്നാ തോന്നുന്നേ. എന്താടാ....സ്നേഹത്തോടുകൂടി ഞാന്‍ ചോദിച്ചു. നീയെന്തിനാ പുറത്തുവന്നിരിക്കുന്നേ? എന്നു പറഞ്ഞ് എന്റെ കയ്യേ പിടിച്ചു വലിച്ചുകൊണ്ട് അകത്തു പോയി. നേരെ അടുക്കളയിലേക്കു കൂട്ടിക്കൊണ്ടുപോയി. ഓ..ഇനി കറി വെക്കാന്‍ എന്റെ സഹായവും വേണമോ ആവോ?

ആടുക്കളയിലെ കുഞ്ഞു ജനലിന്റെ അരികാലാണ് 3 പേര്‍, എത്തിക്കുത്തി താഴേക്കു നോക്കുന്നു. ഇന്നലത്തെ
പാത്രങ്ങള്‍ മുഴുവന്‍ സിങ്കില്‍ കിടക്കുന്നു. സലിം കുമാര്‍ പറയുന്ന പോലെ കൊച്ചി എത്തി എന്നു പറയാറായില്ലെന്നു മാത്രം. അവിടെ നിന്നും കസിന്‍ പിന്നെ കുളിമുറിയില്‍ കൊണ്ടുപോയി, അവിടെയും ജനലിലൂടെ 2 പേര്‍ എത്തിക്കുത്തി നോക്കുന്നു. അവരേം കാണിച്ചിട്ടു എന്നോടു പറഞ്ഞു, നീ അതിലേം ഇതിലേം പോയിരുന്നു അവരെ ശല്ല്യം ചെയ്യരുത്.

രാജാജി നഗറിലെ തന്നെ മരിയപ്പന്‍പാളയ പാര്‍ക്കിനു പുറകുവശത്തായാണ് നമ്മുടെ വീട്. വീട്ടിലെ അടുക്കള,
ബാത്ത് റൂം, ടെറസ് ഇവിടെ നിന്നൊക്കെ നോക്കിയാ (മൊബൈല്‍ അല്ലാ, നോക്കിയാല്‍ എന്നര്‍ത്ഥം) പാര്‍ക്കിന്റെ പുറകുവശം നന്നായി കാണാം. സാമാന്യം വലിയ പാര്‍ക്കായതിനാലും ബാംഗ്ലൂര്‍ പ്രണയനഗരമായതിനാലും ജോടികള്‍ അനാവശ്യ പ്രണയങ്ങള്‍ക്കായി കൂടുതലും തിരഞ്ഞെടുത്തിരുന്നത് ആ ഭാഗത്തു തന്നെയായിരുന്നു. പൂത്തുലഞ്ഞു നില്‍ക്കുന്ന നിരവധി മരങ്ങളുടെ മറവുണ്ടെങ്കിലും ഇവിടെ എതിര്‍ ലിംഗത്തില്‍ പെട്ട എന്തിനേയും ആര്‍ത്തിയോടുകൂടി സമീപിക്കുന്ന ഒരു പറ്റം ചെറുപ്പക്കാരുടെ വീടുണ്ടെന്നു അവര്‍ക്കറിയില്ലല്ലോ. അതിനായിരുന്നു അടുക്കളയിലും മറ്റും ഇത്ര തിക്കും തിരക്കും. ഒഴിഞ്ഞ കോണിലെ ആള്‍ക്കാര്‍ തിരഞ്ഞെടുക്കുന്ന എല്ലാ മരത്തിന്റെയും ചുവട്ടിലേക്ക്, കല്ലും കമ്പും രാത്രിയില്‍ എറിഞ്ഞ്, ഇടതൂര്‍ന്ന മരച്ചില്ലകള്‍ക്കിടയിലൂടെ ഒരു ഏരിയല്‍ വ്യൂ ഉണ്ടാക്കിയിട്ടുണ്ടെന്ന് അവരാരെങ്കിലും അറിയിന്നുണ്ടോ?

വൈകുന്നേരം ഞാന്‍ വന്ന വകയില്‍ ചിക്കണ്‍, MCR, റമ്മി കളി അങ്ങനെ തകര്‍ത്തു വാരി ബോധം കെട്ടുറങ്ങി. തമ്മില്‍ ഇത്തിരി ബോധം ഉണ്ടായിരുന്നത് എനിക്കു മാത്രം. എല്ലാവരും വെട്ടു ഗ്ലാസില്‍ മടക്കുമടക്കെന്ന് അടിക്കുമ്പോള്‍ ഞാന്‍ സിപ്പുചെയ്തു കുടിക്കുന്ന ആര്‍ത്തിയില്ലത്തവനായി ഗമയിലിരുന്നു.
ആഗ്രഹമില്ലഞ്ഞിട്ടല്ലായിരുന്നു, ഒരു കവിളില്‍ കൂടുതല്‍ അകത്തോട്ടിറക്കിയാല്‍ അതിലും സ്പീഡില്‍ പുറത്തോട്ടു വരും എന്നതുകൊണ്ടായിരുന്നു. മെലിഞ്ഞിരുന്നതിനാലും, റ, ട, ഴ എന്നിങ്ങനെ ഏതു ആകൃതിയിലും കിടക്കാന്‍ സാധിച്ചിരുന്ന കൊണ്ടും എല്ലവരുടെയും ഇടക്കായി എങ്ങിനെയോ കിടന്നുറങ്ങി.
രാവിലെ എല്ലാവരും എണീല്‍ക്കുന്നതിനു മുമ്പു തന്നെ ഞാന്‍ ജോലിക്കു പോകും. വൈകുന്നേരം ഞാന്‍ വരുമ്പോള്‍ ആരും കാണുകയും ഇല്ല. സന്ധ്യയാകുമ്പോള്‍ MCR ഉം ബീഫോ ചിക്കണോ മീനോ എന്തെങ്കിലും വീട്ടിലുണ്ടാവും, പിന്നെ റമ്മി കളിയും. 5 പേര്‍ താമസിക്കുന്ന അവിടേക്കു LLB പരീക്ഷ എഴുതാനാ‍യി ചില പുരാണ പ്രജകള്‍ അടുത്ത ആഴ്ച എത്തുന്നതിന്റെ ത്രില്‍ ഇല്‍ ആണ് എല്ലാവരും. ഞാന്‍ ചോദിച്ചു എന്താ എല്ലാവര്‍ക്കും അവര്‍ വരുന്നതില്‍ ഇത്ര സന്തോഷം എന്ന്. കസിന്‍ പറഞ്ഞു, എല്ലാവരും നല്ല കാശ് ഉള്ളവര്‍. ഒരു യൂത്ത് കോണ്‍ഗ്രസ് ത്രിശ്ശൂര്‍ പ്രസിഡന്റ് ഉള്‍പടെ എല്ലാം ബിസിനസുകാര്‍. എല്ലാ വര്‍ഷവും 2 പ്രാവശ്യം പരീക്ഷക്കു വരും, ഓരോ മാസം കള്ളടിച്ചു മരിച്ചിവിടെ കിടന്നു പോകും. അതിനാല്‍ തന്നെ അവരുടെ LLB വര്‍ഷങ്ങളായി തീരാതെ കിടക്കുന്നു. കല്ല്യാണം കഴിഞ്ഞവര്‍, ഗന്ധര്‍വ്വകല്ല്യാണത്തില്‍ മാത്രം ആശ്വസിക്കുന്നവര്‍, താടിയുള്ളവര്‍, മീശയില്ലാത്തവര്‍, വെളുത്തവര്‍, കറുത്തവര്‍, ഹിന്ദുക്കള്‍, മുസ്ലീങ്ങള്‍, ക്രിസ്ത്യാനികള്‍ എന്നിങ്ങനെ വിത്യസ്തരായിരുന്നു എങ്കിലും നാനത്വത്തില്‍ ഏകത്വം പോലെ അവര്‍ക്കെല്ലാവര്‍ക്കും കുടവയര്‍ ഉണ്ടായിരുന്നു.

പണയത്തിനുള്ള സ്വര്‍ണ്ണം ഒക്കെ പണയസ്ഥലത്തു തന്നെ ആയതിനാല്‍ വാച്ചിന്റെ കൂടെ ഇന്‍സ്ട്രമെന്റ് ബോക്സും കൂടി പണയം വെച്ചാണ് ഇന്നലത്തെ കള്ളടി പിള്ളേര്‍ നടത്തിയത്. ഇനി നമ്മുടെ LLB ചേട്ടന്മാര്‍ വരുന്നതു വരെ കാത്തിരിക്കാം എന്നായി സഹമുറിയന്മാര്‍. അവര്‍ കണ്ണിലെണ്ണയൊഴിച്ചു കാത്തിരുന്നു. അവര്‍ കൊണ്ടുവരാമെന്നേറ്റിരുന്ന ബൈനോക്കുലറിനെ സ്വപ്നം കണ്ടു. രാത്രികാലങ്ങളില്‍ റമ്മികളിയുടെ സമയങ്ങളില്‍ എന്നോട് അവരുടെ വീര ഗാഥകള്‍ പറഞ്ഞു. ഞാനും അവരെ പരിചയപ്പെടാന്‍ ആകാംക്ഷാഭരിതനായി.

അന്നൊരു ശനിയാഴ്ച, ഞാന്‍ ഇത്തിരി നേരത്തെ വന്നു. വീട്ടില്‍ ആരും ഇല്ല. അടുക്കളയിലും കുളിമുറിയിലും
സാധാരണ തിരക്കയിരുന്നതിനാലും, ഞാന്‍ പൊതുവെ നല്ല ദുരഭിമാനി ആയിരുന്നതിനാലും ഇതു വരെ ഞാന്‍
ജനലിലൂടെ പാര്‍ക്കിലെ മരച്ചുവടുകള്‍ വീക്ഷിച്ചിരുന്നില്ല. എങ്കിലും യൌവ്വനത്തിന്റെ ആദ്യപടികളില്‍ നില്‍ക്കുന്ന എനിക്ക് ആ അവസരം മുതലാക്കാതെ പറ്റില്ലെന്നായി. ഒറ്റക്കുള്ളപ്പോള്‍ തനി സ്വഭാവം. ആരെങ്കിലും വന്നു കണ്ടാല്‍ ഞാന്‍ ഈ പണിയാണെന്നു കണ്ടാല്‍ മോശമല്ലേ എന്നു കരുതി ഇത്തിരി ഉരുളകിഴങ്ങു കറിയും വെച്ചേക്കാം എന്നു കരുതി.

ആകാംക്ഷാഭരിതനായി ഞാന്‍ നോക്കി, ഏറ്റവും അടുത്ത മരച്ചുവട്ടില്‍ ആരുമില്ല. ഏറ്റവും അകലെ ഒരു ജോഡി ഉണ്ട്, പക്ഷെ കാര്യം കണ്ണാടി ഉണ്ടെങ്കിലും അവിടം നടക്കുന്നതു പലതും സങ്കല്പിക്കേണ്ടിവരും. സഹമുറിയന്മാര്‍ ആണെങ്കില്‍ കാണാന്‍ പട്ടത്തിടത്താണു ജോഡികള്‍ ഇരിക്കുന്നതെങ്കില്‍ രണ്ടുപേര്‍ അവരിരിക്കുന്നതിന്റെ അടുത്തു പോയി ഇരിക്കും, അപ്പോള്‍ അവര്‍ അവിടുന്നു മാറും, അങ്ങനെ നമ്മുടെ സ്പോട്ട് അവരുടെ പ്രിയപ്പെട്ട സ്ഥലമായി മാറി, നമ്മുടെയും. ഞാനിപ്പോള്‍ ഒറ്റക്കല്ലേ? ആറെങ്കിലും വരുന്ന വരെ കാക്കാം. ദൈവമേ, വയസന്മാരുടെ കണക്കു ലോങ് സൈറ്റ് ഉണ്ടായിരുന്നെങ്കില്‍ എന്നാഗ്രഹിച്ചു പോയി. പെണ്ണു കെട്ടിക്കഴിഞ്ഞപ്പോളാണ് ലോങ് സൈറ്റായിരുന്നെങ്കില്‍ അതും വച്ച് ഭാര്യക്കു ഒരു ഉമ്മ കൊടുക്കണമെങ്കില്‍ പോലും കണ്ണാടി വച്ചു തപ്പികണ്ടുപിടിക്കേണ്ടിവരുന്ന പ്രായോഗിക ബുദ്ധിമുട്ടിനെ പറ്റി ചിന്തിച്ചത്. എനിക്കു ഷോര്‍ട്സൈറ്റ് തന്നതിനു ദൈവത്തിനു നന്ദി പറഞ്ഞു. അകലെ നിര്‍ത്തിയാല്‍ ഫ്ലൈയിങ് കിസ്സല്ലേ കൊടുക്കാന്‍ പറ്റൂ. വെറുതയല്ല കിളവന്മാര്‍ കൂടുതലും A പടം കാണാന്‍ കയറുന്നത്, ഒന്നു കാണണമെങ്കില്‍ വേറെന്താ വഴി?

ഉരുളകിഴങ്ങു തോലുപൊളിച്ചു, ആരും വന്നില്ല മരച്ചുവട്ടില്‍. വരും വരാതിരിക്കില്ല, എന്റെ മനസു പറഞ്ഞു. ആ LLB ചേട്ടന്മാര്‍ വന്നയിരുന്നെങ്കില്‍ ബൈനോക്കുലര്‍ വച്ചു അകലെയ്യുള്ളതു കാണാമായിരുന്നു. എന്നാല്‍ ഉരുളകിഴങ്ങ് അരിഞ്ഞു നോക്കാം. അന്ധവിശ്വാസം പാടില്ല എങ്കിലും അതികഠിനമായ ആഗ്രഹം വരുമ്പോള്‍ നമ്മളിലും Superstition ഉണരും. നാറ്റ്വെസ്റ്റ് ക്രിക്കറ്റ് സീരീസ് ഫൈനലില്‍ ഗാംഗുലി 2 മണിക്കൂറാണ് ഡ്രെസ്സിങ് റൂമിന്റെ വാതിക്കല്‍ ഒരു കാല്‍ അകത്തും ഒരു കാല്‍ പുറത്തും ആയി നിന്നത്. മറ്റൊരു കളിയില്‍ സച്ചിന്‍ 1 മണിക്കൂറാ ബാത്ത് റൂമില്‍ നിന്നത്. ഏതായാലും ഉരുളകിഴങ്ങ് അരിഞ്ഞതു വെറുതെ ആയില്ല. അതാ വരുന്നു ഒരു ജോഡി.

ഞാന്‍ കണ്ണൊക്കെ ഒന്നു കഴുകി റെഡി ആയി. മുന്‍വശത്തെ വാതില്‍ ചാരി, അതിനു മുകളില്‍ ഒരു പ്ലാസ്റ്റിക് പാത്രം വച്ചു. ആരെങ്കിലും വന്നാല്‍ അതു താഴെ വീഴുന്ന ഒച്ച കേട്ട് നമുക്കു വീണ്ടും ഉരുളകിഴങ്ങരിയാമല്ലോ, എന്താ ബുദ്ധി.

അവര്‍ മരച്ചുവട്ടില്‍ വന്നു ഒരു ചെറിയ തുണി വിരിച്ചു. ഉം....അവര്‍ എല്ല സജ്ജീകരണങ്ങള്‍ഊമായാണ്
വന്നിരിക്കുന്നതു. അത്ര ചെറുപ്പക്കാര്‍ അല്ല, എന്നു വെച്ചാല്‍ 40സില്‍ ആണെന്നു തോന്നുന്നു. എന്റെ ഉരുളകിഴങ്ങും ഇത്തിരി പഴയത് ആയിരുന്നു, അടുത്ത പ്രാവശ്യം ആവട്ടെ, നല്ല ഫ്രെഷ് ഉരുളകിഴങ്ങു വാങ്ങണം, വീണ്ടും Superstition! അവര്‍ മുഖാമുഖം ഇരുന്നു. ഇവര്‍ പ്രായമുള്ളവര്‍ അല്ലേ, ആക്രാന്തം ഒന്നും കാണില്ലാരിക്കും. കെട്ടിയോനും കെട്ടിയോളും ആണെങ്കില്‍ വീട്ടിലിരുന്നാല്‍ പോരെ? ഇന്നെനിക്കറിയാം, 2 വയസില്‍ താഴെയുള്ള 2 പിള്ളേരായിട്ടു കൂടി, ഒന്നു സല്ലപിക്കണമെങ്കില്‍ അവര്‍ ഒന്നിച്ചുറങ്ങുന്ന ചുരുങ്ങിയ സമയത്തു വേണം. ഞങ്ങള്‍ക്കു നാണം ഉണ്ടായിട്ടൊന്നുമല്ലാ, മൂത്ത ചെറുക്കനു കാണുമ്പോള്‍ നാണമാണ്. കുഞ്ഞവനാണെങ്കില്‍ ഇമ വെട്ടാതെ നോക്കിയിരിക്കും. എന്നാലും ചിന്തിച്ചു, എന്തിനു റിസ്ക് എടുത്തു പാര്‍ക്കില്‍ വരണം? അതോ ഇനി അവര്‍ സ്വന്തം പാതിയെ ചതിച്ചു വന്നിരിക്കുന്ന വഞ്ചകരാണോ? ഓ..എന്തിനാ ഇപ്പോ അങ്ങനെയൊക്കെ ചിന്തിക്കുന്നതു? കണ്ണന്‍ കുഴിയെണ്ണിയേ അപ്പം തിന്നൂ, അല്ലെങ്കില്‍ അജീര്‍ണ്ണം വരും എന്നൊക്കെയുള്ള മോഹന്‍ലാല്‍ വചനങ്ങളൊക്കെ ഞാന്‍ മാറ്റിവച്ചു. കുഴിയെണ്ണാതെ തന്നെ ഇപ്പോല്‍ തിന്നാം. ഞാന്‍ ഉദ്വേഗത്തോടെ കാത്തിരുന്നു.

ജനലിലൂടെ നോക്കാന്‍ എത്തിക്കുത്തി നിന്ന് ഉപ്പൂറ്റി കഴച്ചു. ഇവരെന്നാ മങ്ങാതൊലി കാണിക്കുവാ അവിടിരുന്ന്? ഇതു വെറും സംസാരമേ ഉള്ളോ ഇനി? അല്ല, അതാ ആ അങ്കിള്‍ കയ്യെടുത്തു ആന്റിയുടെ മുടിയിഴകളില്‍ തലോടുന്നു. ഞാന്‍ ഉന്മേഷവാനായി ഉപ്പൂറ്റിയുടെ വേദന മറന്നു. അതാ അങ്കിള്‍ ആന്റിയുടെ മുടിയില്‍ ബലമായ് പിടിച്ചു ഇടത്തോട്ട് തിരിക്കുന്നു. ഞാന്‍ വിചാരിച്ചു, ഇവര്‍ ചെറുപ്പാകാരെക്കാള്‍ കഷ്ടമാണല്ലോ? ഇത്തിരി മയത്തിലൊക്കെ വേണ്ടേ ഇതൊക്കെ ചെയ്യാന്‍? ഒറ്റയടി, എന്റെ മുഖം കൂടി തിരിഞ്ഞു പോയി. (ആന്റിയല്ലാ, അങ്കിള്‍ തന്നെ) എന്തായിപ്പോള്‍ ഇത്? പിന്നെ അടിയുടെ തിരമാലകള്‍, മുടി പിടിച്ചു വലിച്ചിട്ട് കരണത്തിനു തന്നെ പൊട്ടിക്കുന്നു. എന്തൊക്കെയോ ആക്രോശിക്കുന്നു. എന്റെ മനസു വേദനിച്ചു. ഇറങ്ങിച്ചെന്നു അങ്കിളിനെ കുനിച്ചു നിറുത്തി മുതുകത്തിനിട്ട് കല്ലുകൊണ്ടിടിക്കാന്‍ തോന്നി. എന്നാലും ഒരു ശരാശരി മലയാളിയെ പോലെ എന്റെ ഉപ്പൂറ്റി അവിടെ തന്നെ ഉറച്ചു നിന്നു. അയ്യോ..ആ ആന്റിയുടെ വായില്‍ നിന്നും ചോരയല്ലേ വരുന്നത്?

അങ്കിള്‍ ആന്റിയോട് ചേര്‍ന്നിരുന്നു. ബാഗില്‍ നിന്നും ടൌവ്വല്‍ എടുത്ത് ചോരയൊപ്പി, ആന്റിയെകെട്ടിപിടിച്ചു. വീണ്ടും ബാഗില്‍ നിന്നും ഒരു പാത്രം എടുത്തു തുറന്നു. അതില്‍ നിന്നും എന്തൊക്കെയോ വാരി ആന്റിയുടെ വായില്‍ വെച്ചു കൊടുക്കുന്നു. ആന്റിയും വാരിക്കൊടുക്കുന്നു അങ്കിളിന്. തീവ്ര സ്നേഹത്തിന്റെ പ്രകടങ്ങള്‍. ആന്റിയിപ്പോള്‍ അങ്കിളിനെ സ്നേഹം കൊണ്ടു മൂടുന്നു. ഒന്നും മനസിലാവുന്നില്ല. എന്തൊക്കെയാണിത്? എന്തൊക്കെയോ വികാരങ്ങളോടെ സീന്‍ കാണാന്‍ നിന്ന എന്റെയുള്ളില്‍ ഇപ്പോള്‍ എന്തൊക്കെയോ നൊമ്പരങ്ങള്‍ മാത്രം. മുടിക്കു കുത്തിയുള്ള ആ പിടിത്തവും, മുഖത്തെ ചോരയും, പിന്നീടുള്ള ആന്റിയുടെ സ്നേഹവും, എനിക്കൊന്നു മാത്രം മനസിലായി, ഞാന്‍ യോഗമില്ലാത്തവനാണെന്ന്. നല്ല എരിവോടെ ഞാന്‍ ഉരിളക്കിഴങ്ങു കറി വെച്ചു.

പിന്നീടാണറിഞ്ഞത് ഇതു സ്ഥിരം ആള്‍ക്കാരാണ് എന്നും, sadist, masochist ഒക്കെയാണെന്നും മറ്റും. എന്തായാലും ഞാനും സഹമുറിയന്മാരോട് നല്ല കൂട്ടായപ്പോള്‍ ആദ്യം ചെയ്തത് അവരെ അവിടെ വരാതാക്കുക എന്നുള്ളതായിരുന്നു. അവര്‍ക്കു രണ്ടു പേര്‍ക്കും അതിഷ്ടമായിരിക്കാം, വേറേ സ്ഥലം ഇല്ലാഞ്ഞിട്ടായിരിക്കും, പക്ഷെ എന്തോ അനിക്കതു കാണാന്‍ സാധിച്ചിരുന്നില്ല. എന്നാല്‍ ആ ജനലിലെ നോട്ടം വെണ്ടെന്നു വെക്കാനും.

Read more...

എന്റെ പെണ്ണ്

>> Thursday, August 21, 2008

അങ്ങനെ നാളെ ഞാന്‍ എന്റെ ഭാര്യയേയും മക്കളേയും കാണാന്‍ പോകുന്നു. ഏതാനും മാസങ്ങളായി ഞങ്ങള്‍ കണ്ടിട്ട്. അതു കൊണ്ടു തന്നെ ഞങ്ങള്‍ നല്ല ത്രില്ലില്‍ ആണ്. എന്നാല്‍ സഹിക്കാനാവാത്തത് എയര്‍പോര്‍ട്ടിലെ താമസങ്ങളാണ്. എന്തായാലും ആ ബോറന്‍ സമയം ഭാര്യയുമായുള്ള പഴയ ഓര്‍മ്മകള്‍ അയവിറക്കനായി ചിലവഴിച്ചു.
പാവമാണവള്‍, എന്നെയും പരിചരിച്ച് ഇരിക്കാനാണ് അവള്‍ക്കിഷ്ടം. അതു തന്നെയാണ് എനിക്കും ഇഷ്ടം (എന്നെ പരിചരിക്കുന്നത് - തിരിച്ചു പരിചരിക്കാന്‍ അത്ര താല്പര്യം പോരാ). കുന്നോളം മോഹിച്ചാലേ കുരുവോളം കിട്ടുകയുള്ളൂ എന്ന വാക്കു കേട്ട് നല്ല നാളുകളില്‍ എന്റെ പ്രണയങ്ങള്‍ മുഴുവനും ശ്രീദേവി, സ്റ്റെഫി ഗ്രാഫ് തുടങ്ങിയ സുന്ദരികളും പ്രഗല്‍ഭരുമൊക്കെയായവര്‍ ആരുന്നു. പിന്നീട് പ്രേമിക്കാനുള്ള ആശ മൂത്ത് പ്രാക്ടിക്കാലിറ്റിയുടെ ബുള്‍ഡോസര്‍ വച്ച് കുന്നു മാന്തി വലിപ്പം കുറച്ചു കൊണ്ടുവന്നെങ്കിലും അതവസാനം കുരുവായിട്ടും നമ്മുടെ കാര്യം സങ്കല്പത്തില്‍ തന്നെ ഒതുങ്ങി നിന്നു. എന്തൊക്കെയായാലും അതെല്ലാം കൂട്ടി വെച്ച് ഇപ്പോള്‍ എന്റെ ഭാര്യക്കുകൊടുക്കാന്‍ സാധിക്കുന്നതിനാല്‍ അവളും ഖുശി ഖുശി.
സാധാരണ എവിടെ പോയാലും, കോലില്‍ തുണി ചുറ്റിവെച്ചാല്‍ പോലും അതിനു സൌന്ദര്യമുണ്ടോ എന്നു നോക്കുന്ന ഞാന്‍ മോഹന്‍ലാല്‍ പറയുന്നപോലെ പല തരത്തില്‍ പല സൈസില്‍ പല നിറത്തില്‍ ഒഴുകി നടക്കുന്ന എയര്‍പോര്‍ട്ടിലെ സുന്ദരിമാരെയൊക്കെ വിട്ട് എന്റെ ഭാര്യയുടെയും മക്കളുടെയും ഓര്‍മ്മകളിലേക്ക് കടന്നു. രണ്ടാമത്തവന്‍ ഇത്തിരി കുറുമ്പനാണെന്നാണ് കേട്ടത്. എന്തായാലും എന്റെ ഓര്‍മ്മകള്‍ ഇതാ 2006 ലേക്കു പറക്കുന്നു. ഞങ്ങള്‍ കല്യാണം കഴിക്കുന്ന കാലഘട്ടം.
കാവ്യയുടെ മുടി, ഹേമമാലിനിയുടെ കണ്ണ്, ലക്ഷ്മി ഗോപാലസ്വാമിയുടെ തൊലി തുടങ്ങി ലോകത്തിലെ എല്ലാ സുന്ദരികളുടെയും നല്ല ഗുണങ്ങള്‍ എല്ലാം ഉണ്ടായിരിക്കണം എന്റെ പെണ്ണിനു എന്നായിരുന്നു ഒരു ശരാശരി ആണ്‍കുട്ടിയും ഇത്തിരി അന്തര്‍മുഖനും ആയ എന്റെ ആഗ്രഹം. എല്ലാ സുന്ദരികളേയും എനിക്കിഷ്ടമാണ്, എന്നു വെച്ചാല്‍ ഇനി എല്ലാരെയും ഒന്നിച്ചു കല്യാണം കഴിക്കണം എന്നു പറഞ്ഞാലും എനിക്കു അതൊരു ബുദ്ധിമുട്ടേ അല്ലായിരുന്നു. എന്തായാലും ദുബായിയില്‍ നിന്നും 1 മാസം അവധിക്കായി നാട്ടില്‍ ചെല്ലുമ്പോള്‍ എല്ലാ ഗുണങ്ങളും തികഞ്ഞ ഒരു പെണ്ണിനെ കണ്ടിട്ട്, എനിക്ക് അവളെ കെട്ടാതെ പറ്റില്ല എന്നു വാശി തോന്നിയാല്‍ വേണമെങ്കില്‍ കെട്ടുന്ന കാര്യം ആലോചിക്കാം എന്നൊക്കെയായിരുന്നു എന്റെ മനസില്‍ സത്യമായും ഉണ്ടായിരുന്നത്.
എന്നും രാവിലെ കുളിച്ച് ഈറന്‍ അണിഞ്ഞ് ,(വല്ല്യ പ്രയാസം ആണു ഇന്നത്തെ കാലത്ത്) സെറ്റുസാരിയും ഉടുത്ത് വരുന്ന ഒരു ഭാര്യയെ ആയിരുന്നു ഒരു ശരാശരി നാട്ടിന്‍ പുറത്തുകാരനായ എന്റെയും സങ്കല്പം. ഉണ്ടക്കണ്ണുകളും, കോലന്‍ മുടിയും ഒക്കെയുള്ള, മുടിയില്‍ മുറ്റത്തെ മുല്ലയില്‍ നിന്നുള്ള പൂവ് വെച്ച് (പാണ്ടി മണം ഇല്ലാത്ത മുല്ല) എന്നെ വിളിച്ചെഴുന്നേല്പിച്ച് ഒരു ജ്യുസുമായി (പാല്‍, ചായ, കാപ്പി ഇതൊക്കെ ഹാങ് ഓവര്‍ ഉള്ളപ്പോള്‍ ശരിയാവില്ല) നില്‍ക്കുന്ന ഭാര്യയെ ഞാന്‍ സങ്കല്‍പ്പിക്കാന്‍ തുടങ്ങി. അവളുടെ ദേഹത്തുള്ള ആ തണുപ്പ്, മുടിയിലെ ചെറിയ നനവ്, powder ഇടാത്ത മുഖമാണ് ഇഷ്ടമെങ്കിലും ക്യൂട്ടിക്കൂറായുടെ ചെറിയ ഒരു മണം ഇതൊക്കെയുള്ള ഒരു നിഷ്കളങ്ക ആയ പെണ്ണിനെ ആയിരുന്നു ഞാന്‍ സ്വപ്നം കണ്ടിരുന്നത്. എനിക്കിഷ്ടമുള്ള ഭക്ഷണം ഓരൊ ദിവസവും മെനു മാറ്റി, fridge ഇല്‍ ഒന്നും വെക്കാതെ വെച്ചു വിളമ്പി തരാനും, എന്റെ പറ്റുന്നിടത്തോളം കുട്ടികളെ പ്രസവിക്കാനും, രണ്ടെണ്ണം വീശാന്‍ നേരം ഗ്ലാസും ഐസുമായി വരാനും, ദേഷ്യം വരുമ്പോള്‍ രണ്ടു വീക്കു കൊടുക്കാനും ഒക്കെയുള്ള ഒരു ജീവി, ഇതായിരുന്നു ഒരു പുരുഷാഥിപധ്യത്തിന്റെ വാക്താവായ എന്റെയും പ്രതീക്ഷകള്‍.
സങ്കല്പങ്ങളുടെ അതിപ്രസരണം മൂലമാണോ എന്തോ എനിക്ക് കല്ല്യാണം കഴിക്കണം എന്ന ആഗ്രഹം നാട്ടില്‍ ചെന്നു രണ്ട് ദിവസം കഴിഞ്ഞപ്പോള്‍ മൂര്‍ച്ചിച്ചു. കൂട്ടുകാര്‍ എല്ലാം ഭാര്യമാരുമാ‍യി കറങ്ങുന്നു, ഞാന്‍ അവര്‍ക്കൊരു കട്ടുറുമ്പാകുന്നു, അഴിച്ചുവിട്ടാല്‍ പിന്നെ കൂട്ടില്‍ കയറാന്‍ മടിയുള്ള വീട്ടിലെ ബ്ലാക്കി അനിയന്റെ വടി കാണുമ്പോള്‍ വാലും താഴ്ത്തി കൂട്ടില്‍ കയറുന്ന പോലെ തെണ്ടി തിരിഞ്ഞു നടന്നിരുന്ന ഞാന്‍ വേറെ വഴിയില്ലാതെ വീട്ടില്‍ കയറാന്‍ നിര്‍ബന്ധിതനാകുന്നു. എന്തൊക്കെയോ ഒരു ശ്യൂന്യത. എന്തായാലും പെണ്ണുകാണല്‍ തുടങ്ങാം എന്നു തീരുമാനിച്ചു.
ഞാന്‍ അവധിക്കു വരും മുമ്പേ വീട്ടുകാര്‍ 4-5 പെണ്ണുങ്ങളെ സെലക്ട് ചെയ്ത് എന്റെ selection ആയി വെച്ചിരുന്നു എങ്കിലും ആദ്യമേ പറഞ്ഞ മല അതു വരെ കുരുവാകാഞ്ഞതു കാരണം ഒന്നിനെയും കാണാന്‍ പോലും ഞാന്‍ പോകില്ല എന്നു പറഞ്ഞിരുന്നു. ഒരു പെണ്ണിനെ കണ്ടിട്ടു വേണ്ടാ എന്നു പറഞ്ഞാല്‍ ആ കൊച്ചിനു വിഷമം ആകില്ലേ? അതു മാത്രവുമല്ല No പറയാന്‍ പണ്ടു മുതലേ ഞാന്‍ ഭയങ്കര മിടുക്കനും ആയിരുന്നു. (അല്ലാതെ എല്ലാ പെണ്ണുങ്ങളെയും കെട്ടാന്‍ തോന്നും എന്ന കാരണം ഒന്നുമല്ല കേട്ടോ). ജീവിതത്തില്‍ No എന്ന ചെറിയ വാക്ക് പറയാന്‍ എത്ര പ്രയാസം ആണ് എന്ന് അറിയണമെങ്കില്‍ എന്നോട് ചോദിച്ചാല്‍ മതി.
എന്തായാലും ആദ്യത്തെ കാണല്‍ എരുമേലിക്കപ്പുറത്ത്, ഒരു വാധ്യാരുടെ മോള്‍, MCA കഴിഞ്ഞു ചൂടോടെ നില്‍ക്കുന്നു. നല്ല കണ്ണുകള്‍ ഉള്ള മെലിഞ്ഞ ഒരു പെണ്‍കുട്ടി. എന്റെ ലാളിത്യ ചിന്തകള്‍ക്കു എരിവു കൂട്ടി അവള്‍ ഒരു ചുളുങ്ങിയ ചുരിദാര്‍ ഒക്കെ ഇട്ടിരിക്കുന്നു. ആങ്ങള ഗല്‍ഫില്‍ നിന്നും പെങ്ങളുടെ കല്യാണം നടത്താന്‍ എത്തിയിരിക്കുന്നു. പെണ്‍കുട്ടിയുമായി പേര്‍സണലായി സംസാരിച്ചപ്പോള്‍ ഇത്തിരി നീറിന്റെ സ്വഭാവം ഉള്ള ഒരു ചെറിയ ഫീലിങ് തോന്നി എങ്കിലും മൊത്തത്തില്‍ കുഴപ്പം തോന്നിയില്ല. എന്നാലും വീട്ടുകാര്‍ക്കു ഒരു തളര്‍ച്ച പോലെ തോന്നി, മൊത്തത്തില്‍ ഒരു ഉന്മേഷം ഇല്ലായ്മ. ഇവള്‍ നിന്റെ പെണ്ണ് എന്നു കര്‍ത്താവിന്റെ സ്വരം കേള്‍ക്കുന്നില്ല. എന്തായാലും അറിയിക്കാം എന്നും പറഞ്ഞ് അവിടെ നിന്നും ഇറങ്ങി. കൂടെ വന്ന London അളിയനും പെങ്ങളും കുഴപ്പമില്ല എന്നു പറഞ്ഞു എങ്കിലും മൊത്തത്തില്‍ നമ്മുടെ മാര്‍കെറ്റ് അറിയാം എന്നു വെച്ചു.
അടുത്തതായി ഒരു Bsc nurse, കാലത്തിന്റെ ട്രെന്റ് അനുസരിച്ച് ലോകത്തെവിടെയും പോയി ജോലി ചെയ്യനുള്ള അവകാശമുള്ളവര്‍. 10 വര്‍ഷത്തോലമായി വിവിധ ജോലികള്‍ ചെയ്ത് ഒന്നും നേടാനാവാതെ പോയ ഒരു പാഴ് ജന്മമായിരുന്നതിനാല്‍ ഇനിയുള്ള കാലം കുട്ടികളെയും നോക്കി, ഇത്തിരി ചീട്ടും കളിച്ച്, 2 എണ്ണവും വിട്ടിരിക്കുന്ന കാര്യവും പരിഗണനയില്‍ വന്നു. വീടിനു അടുത്തുള്ള സ്ഥലം ആയിരുന്നതിനാല്‍ നമ്മുടെ കുടുംബവും മറ്റും അറിയാവുന്നവര്‍. ചെന്നു കണ്ടപ്പോള്‍ എന്റെ ഒപ്പം പൊക്കവും, എന്നെ ഒക്കത്തിരുത്താവുന്ന തഞ്ചവും പെരുമാറ്റത്തില്‍ തര്‍ക്കവും തണ്ടും. ഓടി രക്ഷപെട്ടു ഞാന്‍. ദൈവമേ,ഈ ലോകത്തു നല്ല പെണ്ണുങ്ങള്‍ ഒക്കെ എവിടെ പോയി ഒളിച്ചു? വഴിയില്‍ വായി നോക്കി നടക്കുമ്പോള്‍ എല്ലായിടത്തും തരുണീമണികള്‍.
അങ്ങനെ സാഹചര്യ സമ്മര്‍ദ്ദവശാല്‍ ഞാന്‍ കാലക്രമേണ എന്റെ ഭാര്യയായ കൊച്ചിനെ കാണാന്‍ പോയി. കാല്‍ക്രമേണ എന്നു പറയാന്‍ പറ്റില്ല, ദിവസക്രമേണ എന്നു വേണമെങ്കില്‍ പറയാം, കാരണം 15 ദിവസത്തിനുള്ളില്‍ അവള്‍ എന്റെ ഭാര്യയായി മാറി. ചെന്നു കണ്ടപ്പോള്‍ ഇത്തിരി മിണ്ടാന്‍ തോന്നി. ഉണ്ട കണ്ണ്, കോലന്‍ മുടി, മെലിഞ്ഞ് ഇത്തിരി പൊക്കം ഇതൊന്നും ഇല്ലാത്ത എന്നാല്‍ കണ്ടപ്പോളെ അയ്യോ എന്നു വെച്ച് ഓടാന്‍ തോന്നാത്ത ഒരു കൊച്ച്. ഒരു മംഗോളിയന്‍ ലുക്ക് ഉള്ള ഇത്തിരി വണ്ണം ഉള്ള വെളുത്ത ഒരു കൊച്ച്. വീട്ടുകാര്‍ നേരത്തെ കണ്ടിരുന്ന കൊണ്ട് ഫോട്ടോ ഒക്കെ അയച്ചു തന്നിരുന്നു. അതില്‍ കണ്ടപ്പോള്‍ കന്യാസ്ത്രീമഠത്തില്‍ ജോലിക്കു നില്‍ക്കുന്ന പെണ്ണുങ്ങളുടെ പ്രതീതി തോന്നിയതിനാല്‍ കാണുകയേ വേണ്ടാ എന്നു വെച്ചിരുന്നെങ്കിലും, കാണേണ്ടിവന്നു. കണ്ടപ്പോള്‍ എന്തോ ഒത്തിരി മിണ്ടാന്‍ തോന്നി. എന്നാലും ഐശ്വര്യാ മാറി ഷക്കീല ആവാന്‍ വേണ്ട സമയത്തിന്റെ പകുതി എങ്കിലും വേണ്ടേ സാധാരണ ഒരാളെ ഇഷ്ടപ്പേടാന്‍. അതു കൊണ്ട് 3 ദിവസം കഴിഞ്ഞു പറയാം എന്നു പറഞ്ഞു.
അടുത്ത ദിവസം നടന്നത് മൂന്നാര്‍ മുതല്‍ മുണ്ടക്കയം വരെ ഓടി നടന്നുള്ള പെണ്ണുകാണല്‍ ആയിരുന്നു. ഡല്‍ഹിയില്‍ പഠനവും ജോലിയും കഴിഞ്ഞു അയര്‍ലണ്ടിനുള്ള വണ്ടിക്കു കൈയ് കാണിക്കാന്‍ നില്‍കുന്ന Bsc നഴ്സിന്റെ അപ്പന്റെയും ചേട്ടന്റെയും മനോഭാവം, അതൊരു പാവം പെണ്ണായിട്ടു കൂടി വേണ്ടെന്നു ഞാന്‍ വേണ്ടെന്നു വെച്ചു. എന്റെ ജോലിയും സര്‍ട്ടിഫിക്കേറ്റും ഒക്കെ ഒറിജിനല്‍ ആണോ എന്നു ഞാന്‍ തെളിയിച്ചു കൊടുക്കണം എന്നൊക്കെയുള്ള രീതിയില്‍ ഉള്ള അവരുടെ ജാട എന്റെ ജാടയെ മുറിവേല്പിച്ചു എന്നതു സത്യം. അല്ലാതെ സര്‍ട്ടിഫിക്കറ്റിനു ശേഷം ഞാന്‍ അണാണെന്നു തെളിയിച്ചു കാണിക്കണം എന്നു പറയും എന്നുള്ള പേടി കൊണ്ടല്ല. പിന്നെ ജോലിയുള്ളത്, ഇല്ലാത്തത്, സുന്ദരികള്‍, വിരൂപികള്‍ എന്നിങ്ങനെ അവസാനം 7 പേരെ കണ്ട് അന്നത്തെ പരിപാടി അവസാനിപ്പിച്ചു.
വൈകുന്നേരം വീട്ടില്‍ ഒറ്റക്കിരുന്നു. Duty free സാധനങ്ങള്‍ എല്ലാം തീര്‍ന്നതിനാല്‍ പഴയ ഓര്‍മ്മകള്‍ അയവിറക്കാനായി വാങ്ങിയ MC Celebration ല്‍ നിന്നും ഒരു ലാര്‍ജ്ജ് എടുത്ത് തുടങ്ങി - ആലോചനയും റമ്മടിയും. എന്താണു ജീവിതം? എന്താണു കല്ല്യാണം? ഏതു തരം പെണ്ണു വേണം? എങ്ങിനത്തെ കുടുംബം വേണം? സിഗരറ്റുകള്‍ എരിഞ്ഞമര്‍ന്നു. ഐസിട്ടു തണുപ്പിച്ച റം അധരങ്ങളില്‍ നിന്നും അന്നനാളം വഴി ആമാശയത്തിലെത്തി അവിടെ നിന്നും കിഡ്നി കാണാതെ കരളിനെ മര്‍ദ്ദിച്ചവശനാക്കി കശേരുക്കളിലെത്തി. എന്റെ മജ്ജയും മാംസവും മാര്‍ദ്ദവപ്പെട്ടതിന്റെ ഫലമായി ഞാന്‍ ചാരിയിരുന്നു. ആന്തരിക അവയവങ്ങളില്‍ നിന്നും ഊര്‍ന്നിറങ്ങിയ മദ്യത്തിന്റെ നേര്‍ത്ത ആറ്റങ്ങള്‍, അതിലെ ഇലക്ട്രോണും പ്രോട്ടോണും ന്യൂട്രോണും കെട്ടിപ്പിടിച്ചുകൊണ്ടു തന്നെ സെറിബെല്ലത്തിന്റെ ബെല്ലടിക്കാതെ മെഡുല്ല ഒബ്ലാംഗേറ്റയുടെ വാതില്‍ ചവുട്ടി തുറന്ന് തലച്ചോറിലെത്തി. ചിന്തകള്‍ തെളിയാനായ് തുടങ്ങിയ മദ്യ സേവ, സിഗരറ്റിന്റെ പുകമറയാല്‍ മങ്ങിയതാവാം. എന്തായാലും നാളെ പ്രഭാതത്തില്‍ നല്ല മനസോടെ കാര്യങ്ങള്‍ തീരുമാനിക്കാം എന്നു വെച്ച് നന്നായി അങ്ങു മിനുങ്ങി, കിടന്നുറങ്ങി.
നല്ല കാറ്റുള്ള സന്ധ്യാസമയം. ചെറായി ബീച്ചിന്റെ വിജനമായ ഭാഗത്തു കൂടി ഞാന്‍ മെല്ലെ നടന്നു. മണല്‍തരികള്‍ക്ക് സ്വര്‍ണ്ണനിറം. സൂര്യന്‍ പാതി കണ്ണടച്ചു കഴിഞ്ഞു. കാറ്റിനു ചെറിയ തണുപ്പ്, മണല്‍തരികള്‍ക്കു ചെറുചൂട്. എന്റെ നിഴലിനു നീളം കൂടി തീരത്തിനരികിലുള്ള യൂക്കാലിപ്റ്റസ് മരങ്ങളുടെ ഇടയിലൂടെ പോയി. മീന വരമെന്നു പറഞ്ഞിരുന്നു. ഒരു ഇളം നീല ഷിഫോണ്‍ സാരിയുടുത്തതാ അവള്‍ വരുന്നു. പ്രശസ്തിയും പണവും ഉണ്ടെങ്കിലെന്താ, അവളുടെ കണ്‍കോണുകളില്‍ എപ്പോളും ഒരു തുള്ളി നിറഞ്ഞിരിക്കുന്നപോലെ. കടല്‍ തീരത്തിരുന്നു സിനിമാനടി മീനയുമായി സല്ലപിച്ചിരുന്നപ്പോള്‍ മനസിനുള്ളില്‍ എന്തൊരു സുഖം. ആ കണ്ണുകളില്‍ നോക്കിയിരുന്നു ഞാന്‍. ഇത്തിരി പൊങ്ങിയ ആ മേല്‍ചുണ്ടില്‍ ഒരുമ്മ കൊടുത്തു ഞാന്‍. സിനിമാഭിനയത്തിന്റെ തിരക്കുകള്‍ക്കിടയില്‍ ഒരിത്തിരി മനുഷ്യസ്ത്രീ ആവാനായി എന്റടുത്തു വന്ന പാവം മീന. എനിക്കു എന്റെ രൂപം തന്നെയായിരുന്നെങ്കിലും മോഹന്‍ലാലിന്റെ ഒരു ചെറിയ സാമ്യം ഇല്ലാതില്ല എന്നു പറയാതെ വയ്യ. പെട്ടെന്നണ് കടലില്‍ നിന്നും നരസിംഹത്തിലെ മോഹന്‍ലാല്‍ ആക്രോശത്തോടെ ഓടി വന്നത്. പെട്ടെന്നു തന്നെ രൂപം മാറി ഉടയോനിലെ കുഞ്ഞിപ്പാപ്പയായി. എന്തൊരു ക്രൂരഭാവം ആണ് ഇപ്പോള്‍ മോഹന്‍ലാലിന്റെ മുഖത്ത്. തൂക്കിയെടുത്തെറിഞ്ഞു എന്നെ കടലിലേക്ക്. കുറച്ചുനേരം നീന്തിയെങ്കിലും കാലുകള്‍ കുഴയാന്‍ തുടങ്ങി. താഴേക്കു താണുതുടങ്ങി, ശ്വാസം കിട്ടുന്നില്ല. സമുദ്രാടിത്തട്ടിലെ അത്യഗാഥ ഗര്‍ത്തത്തിലേക്കു താണുപോകതിരിക്കാന്‍ ഇരയെത്തേടി വന്ന കിനാവള്ളിയുടെ വള്ളിയില്‍ പിടിച്ചുനോക്കി. പുതപ്പില്‍ പിടിച്ചു വലിച്ചാലും കട്ടിലില്‍ നിന്നു താഴെ പോകതിരിക്കുമോ? എന്തായാലും മീനയെ കണ്ടതുകൊണ്ട് നേരത്തെ എണീക്കാന്‍ സാധിച്ചു.
രാവിലെ ഏതയാലും കുളിച്ചു കുട്ടപ്പനായി ചിന്തിക്കാനിരുന്നു. കാര്യം ഇന്നലത്തെ പെണ്ണുകാണല്‍, അല്ഫോന്‍സാ കോളേജിനു മുമ്പില്‍ KMS ലേഡീസ് ഒണ്‍ലി വന്നു നിന്നപ്പോള്‍ നോക്കിയപോലെ ആയെങ്കിലും അയവിറക്കി നോക്കി. വേണ്ട, അതൊന്നും വേണ്ട. അങ്ങനെ വീണ്ടും ഞാന്‍ എന്റെ കൊച്ചിന്റെ കാര്യം അലോചിച്ചു. അമ്മ ചോദിച്ചു, എന്താടാ മോനെ അലോചന, ആരേം ഇഷ്ടപ്പെട്ടില്ലെ? ഞാനൊന്നും മിണ്ടിയില്ലെങ്കിലും അമ്മക്കു മനസിലായി എന്റെ മാനസിക വ്യാപാരങ്ങള്‍. ആമ്മ പറഞ്ഞു, നീ ആ കുറവിലങ്ങാട്ടിലെ പെണ്ണിനെ (എന്റെ കൊച്ച്) നന്നായി ഒന്നു ചിന്തിച്ചു നോക്കു. അവള്‍ നിന്നെ പൊന്നുപോലെ നോക്കിക്കൊള്ളും. എന്നാലും ഇത്തിരി കൂടി ബുള്‍ഡോസര്‍ വച്ചു മാന്താന്‍ ഉണ്ടായിരുന്നു എന്റെ സങ്കല്‍പ്പങ്ങള്‍. എന്റെ പ്രയാസം കണ്ടിട്ടു ചാച്ചയുടെ ചേട്ടന്‍ വാഗ്ദാനം ചെയ്തു, ഞാന്‍ കണ്ടിട്ടു പറയാം എന്ന്‍.
അങ്ങനെ രണ്ടാം വട്ട കാഴ്ച. ചാച്ചയുടെ 3 ചേട്ടന്മാര്‍ തലയെടുപ്പോടെ സോഫായില്‍ ഇരിക്കുന്നു. അമ്മാവനും ആന്റിയും അമ്മയും ഇത്തിരി കൂടി friendly അപ്രോച്ച് ആണ്. പെണ്ണിനെ കാണുന്ന വരെ എല്ലാവരും വളരെ മസില്‍ പിടിച്ചിരുന്നു. എന്തായാലും പെണ്ണിനെ കണ്ടപ്പോള്‍ ചാച്ചയുടെ ചേട്ടന്മാര്‍ തമാശൊക്കെ പറയാന്‍ തുടങ്ങിയതോടെ എനിക്കു മനസിലായി, ഇവള്‍ തന്നെ എന്റെ പെണ്ണ്. പിന്നെ ഒന്നുകൂടി വര്‍ത്തമാനം പറയാന്‍ ഇരുന്ന എന്നെ എഴുന്നേല്പിക്കാന്‍ അമ്മാവനു വന്നു ജനലില്‍ കൂടി വാണിങ് തരേണ്ടി വന്നു എന്നതു സത്യം.
അങ്ങനെ മനസമ്മതം, ചരക്കെടുക്കല്‍, ബച്ചെലേര്ഴ്സ് പാര്‍ട്ടി, കല്ല്യാണം ഒക്കെ സംഭവബഹുലമായി തന്നെ നടന്നു. സംസാരപ്രിയനായ ഞാന്‍ എന്റെ ഏക സംസാരത്തോട് സംസാരമാകുന്നതിനു മുമ്പു കിട്ടിയ ചുരുങ്ങിയ ദിവസങ്ങള്‍ ഒട്ടും നഷ്ടപെടുത്താതെ തന്നെ BSNL ന്റെ സഹായത്തോടു കൂടെ തന്നെ ഉപയോഗപ്പെടുത്തിയതിനാല്‍ എന്റെ ആക്രാന്തം അവള്‍ക്കും മനസമ്മതം, ചരക്കെടുക്കല്‍, കല്ല്യാണം ഇതിനൊക്കെ ഞങ്ങളുടെ ഡ്രൈവര്‍ ആയി വന്ന സ്വന്തക്കാര്‍ക്കും മനസിലായി എന്നതു വാസ്തവം. ഇത്രനാളും ഞാന്‍ സങ്കല്പത്തിലൂടെ വെറുതെ കളഞ്ഞിരുന്ന എന്റെ സ്നേഹവും വികാരങ്ങളും ഞാന്‍ ഒരു നിമിഷവും പാഴാക്കാതെ അവള്‍ക്കു പകര്‍ന്നു. അവള്‍ ലോകത്തിലെ ഏറ്റവും ഭാഗ്യവതുയെന്നു വിശ്വസിച്ചു. ദൈവത്തെ പോലും മറന്നു അവള്‍ എന്നെ സ്നേഹിച്ചു. ഞാനവളെയും.
കല്ല്യാണപിറ്റേന്നു തന്നെ സ്നേഹത്തിന്റെ തീവ്രതയില്‍ പെട്ട് സ്വന്തം രഹസ്യങ്ങളും സ്വഭാവ സവിശേഷതകളും ഗീര്‍വാണങ്ങളും വിളമ്പി ജീവിതം ഭാര്യയുടെ കാല്‍ക്കീഴില്‍ ആക്കരുത് എന്നുള്ള അനുഭവസ്തരുടെ ഉപദേശത്തിനാല്‍ ഞാന്‍ പൂര്‍ണ്ണമായും തമാശുകളും കളിചിരികളുമായി ഉല്ലസിച്ചുപോന്നു. ആകെയുള്ള 10 ഡേയ്സ് ചെറിയ യാത്രകളും ഒക്കെയായി ഞങ്ങള്‍ ഉല്ലസിച്ചു. എങ്കിലും എല്ലാ സധാരനക്കരെയും പോലെ ഞാനും ഭാര്യയുടെ മുമ്പില്‍ ഇത്തിരി ഭയങ്കരനാ ഞാന്‍ എന്നു വരുത്താന്‍ ഉള്ള വേലത്തരങ്ങള്‍ ഒക്കെ ചെയ്തിരുന്നു. കാര്‍ നല്ല സ്പീഡില്‍ ഓടിക്കുക, സൈഡുതരാത്ത ഹണിമൂണിനു പോയ വര്‍ക്കലയിലെ ബീച്ചില്‍ തലയും കുത്തി മറിയുക, കേട്ടിട്ടില്ലാത്ത കോക്ടൈല്‍ (ഒരെണ്ണത്തിനു ഒരു ഫുള്‍ MCR ന്റെ വിലയാ) രാവിലെ ചായക്കു പകരം ഇതൊക്കെയാണു എന്റെ പതിവെന്നമട്ടില്‍ അടിക്കുക എന്നിങ്ങനെയുള്ള സാമാന്യം തരക്കേടില്ലാത്ത പൊട്ടത്തരങ്ങള്‍ ചെയ്തിരുന്നു. അതെല്ലാം സാധാരണ പുതു മണവാട്ടികള്‍ ചെയ്യുന്ന പോലെ അവളും നന്നായി ആസ്വദിക്കുന്നതായി കാണിച്ചിരുന്നു. എന്തായാലും ജീവിതത്തിലെ ഏറ്റവും ആസ്വാദ്യകരമായ നിമിഷങ്ങളിലൂടെ ഞങ്ങള്‍ ആ 10 ദിവസങ്ങള്‍ പിന്നിട്ടു.
അങ്ങനെ പരസ്പരം മനസിലാക്കികൊണ്ടിരുന്ന ആ നിമിഷങ്ങളിലാണ് ഞാനും എന്റെ ഭാര്യയെ പറ്റി ശരിക്കും മനസിലാക്കിയത്. ഒരു കൂട്ടുകാരന്റെ വീട്ടില്‍ വിരുന്നു പോയാപ്പോള്‍ അവന്റെ വക നിര്‍ദ്ദേശം, ഞങ്ങളുടെ ഇഷ്ട ലൊക്കേഷന്‍ ആയ വാഗമണ്‍ പോയാലോ എന്ന്. സമയം 5 മണി ആയെങ്കിലും അവനും പുതുമോടിയില്‍ തന്നെ ആയതിനാല്‍ രണ്ടുകൂട്ടരും തയ്യാര്‍. അങ്ങനെ വാഗമണ്‍ മൊട്ടക്കുന്നുകളുടെയും തേയിലക്കാടുകളുടെയും ഒക്കെ രാത്രിയുടെ വന്യസൌന്ദര്യം ആസ്വദിക്കാനായി ഞങ്ങള്‍ പുറപ്പെട്ടു.
ഈരാറ്റുപേട്ടയില്‍ നിന്നും വാഗമണ്‍ റോഡിലേക്കു കയറിയപ്പോളേ നേരം ഇരുട്ടി. കാര്യം ഇരുട്ടു നമ്മുടെ ആജന്മശത്രുവായിരുന്നെങ്കിലും ഭാര്യയും കൂട്ടുകാരനും അവന്റെ ഭാര്യയും ഉണ്ടായിരുന്ന കാരണം കാറിന്റെ ഗ്ലാസ് ഒക്കെ താഴ്ത്തിയിട്ടു. വളഞ്ഞു തിരിഞ്ഞ റോഡുകള്‍, കുത്തനെയുള്ള കൊക്കകള്‍, ഹെയര്‍ പിന്‍ വളവുകള്‍, കയറ്റങ്ങള്‍. പുറത്തുനിന്നും തണുത്ത കാറ്റ് മഞ്ഞുകണങ്ങളുടെ മേമ്പൊടിയോടെ അകത്തേക്കു കയറി, ദുബായിലെ AC ഡെ വൃത്തികെട്ട തണുപ്പല്ലല്ലോ പ്രകൃതിയുടെ തണുപ്പ്. ഒരു കൈ ഗിയറിലും മറ്റേ കൈ സ്റ്റിയറിങ്ങിലുമായി എന്റെ ഡ്രൈവിങ് സ്കില്‍ ഭാര്യേടെ മുമ്പില്‍ കാണിക്കാനായി ശ്രമിക്കാതെ മര്യാദക്കു കൂട്ടുകാരനെ കൊണ്ട് കാര്‍ ഓടിപ്പിക്കുവായിരുന്നെങ്കില്‍ അവളെ കട്ടിപ്പിടിച്ചു തണുപ്പ് ആസ്വദിക്കാമായിരുന്നു. വിനാശകാലേ വിപരീത ബുദ്ധി, അല്ലതെന്താ? എന്തായാലും എന്റെ സ്റ്റൈലന്‍ ഓടിക്കലില്‍ കൂട്ടുകാരനും അവന്റെ ഭാര്യയും നല്ല ആശങ്കാകുലരായിരുക്കയും ഇടക്കിടെ അപശബ്ദങ്ങള്‍ കേല്‍പ്പിക്കുകയും ചെയ്തുപോന്നു. കൂട്ടുകാരന്റെ കാല്‍ മുമ്പില്‍ ചവുട്ടി ചവുട്ടി വണ്ടീടെ പ്ലാറ്റ്ഫോര്‍മില്‍ തുള വീണു എന്നാ തോന്നുന്നെ, അവന്‍ ബ്രെയ്ക് ചവിട്ടാന്‍ ശ്രമിച്ചിട്ട്.
എന്തായാലും വാഗമണ്‍ എത്തി, മൊട്ടക്കുന്നുകള്‍ കടന്നു ഞങ്ങള്‍ സ്വസ്തമായ ഒരിടം തേടി. ഇനി ഞങ്ങളെ കണ്ടാല്‍ കല്ല്യാണം കഴിഞ്ഞവരല്ലാ എന്നു മറ്റുള്ളവര്‍ക്കു തോന്നിയാല്‍ കുറ്റം പറയാന്‍ പറ്റില്ലല്ലോ? കല്ല്യാണം കഴിയാത്തവരും ഇങ്ങനെയൊക്കെ തന്നെയല്ലേ ഇപ്പോള്‍ വരുന്നത്. വണ്ടി ഒരു തേയിലകാട്ടിലേക്കു കയറ്റി. പുറത്തു നിന്നു കാണാന്‍ പെട്ടെന്നു സാധിക്കത്ത കാരണം ഉളിഞ്ഞു നോട്ടക്കാരും കടല വില്പനക്കാരും ഒന്നും ശല്യപെടുത്തുകയും ഇല്ല. കൂട്ടുകാരനും ഭാര്യയും വണ്ടിയുടെ അടുത്തു തന്നെ ഇരുന്നു. ഭാര്യ പറഞ്ഞു നമുക്കു ആ പാറയില്‍ പോയിരിക്കാം. ഇത്തിരി നടക്കണം, രാത്രിയല്ലേ? മനസു പറഞ്ഞു വേണ്ടാ എന്നു. അവള്‍ വിചാരിക്കില്ലേ പേടിയായിട്ടണ് എന്ന്? വഴിയില്‍ പാമ്പും കീരിയും ഒന്നും കാണല്ലേ എന്നു പ്രാര്‍ത്തിച്ചു കൊണ്ടു ഞാനും മറ്റുള്ളവര്‍ കാണാതെ എന്നെ കെട്ടിപ്പിടിച്ചിരിക്കുന്ന സുഖം ഓര്‍ത്തു ഭാര്യയും നടന്നു.
പാറമേല്‍ കെട്ടിപ്പിടിച്ചു ഞങ്ങളിരുന്നു. പഴയ ട്രാന്‍സ്പോര്‍ട്ട് ബസിന്റെ മഴക്കാലത്തെ പടുതാ കാറ്റത്തു പൊങ്ങി അടഞ്ഞിരുന്ന പോലെ അവളുടെ സാരി കാറ്റില്‍ പാറിപറന്നു. ചന്ദ്രന്‍ ഞങ്ങളുടെ കാമ സല്ലാപങ്ങള്‍ നോക്കി നാണത്താല്‍ കാര്‍മേഘത്തിനുള്ളില്‍ മറയുകയും പ്രണയസല്ലാപങ്ങള്‍ കേട്ട് പുറത്തു വരുകയും ചെയ്തുകൊണ്ടേയിരുന്നു. പമ്പോ പഴുതാരയോ വന്നു കുണ്ടിക്കു കടിക്കുമോ എന്നുള്ള എന്റെ പേടി പിന്നീടു പടികടന്നെത്തുന്ന പതനിസ്വരം കേട്ടതേയില്ല. തേയിലക്കടുകളെയും മൊട്ടകുന്നുകളെയും തഴുകിയുറക്കി വന്ന തണുത്ത കാറ്റിനും ഞങ്ങളുടെ കാമത്തിന്റെ അഗ്നിസ്പുലിംഗങ്ങളെ തകര്‍ക്കാനായില്ല, തണുപ്പിക്കാനുമായില്ല. അതൊനൊരു സ്വാഭാവിക അന്ത്യം വരുന്ന വരെ കൂട്ടുകാരനും ഭാര്യയും അവരുടെ കുഞ്ഞു ലീലകളില്‍ മുഴുകി, മടുത്തപ്പോള്‍ കാറില്‍ കയറി ശോകഗാനം കേട്ടു. കിഴക്കുവശത്തിരുന്ന ചന്ദ്രന്‍ കുറച്ചുകൂടി അടുത്തുവന്നു തലക്കു മുകളിലായി, ഞങ്ങലെണീറ്റു.
സാറും ബാറും തമ്മിലുള്ള അക്ഷരസാമ്യത്തേക്കാളേറെ പാലായിലെ ബാറുകളുമായി ബന്ധം സൂക്ഷിച്ചിരുന്ന സാറായ എന്റെ കൂട്ടുകാരന്‍ ഒരു പൈന്റ് കരുതിയിരുന്നു. എന്നെക്കൂടാതെ ഇന്നേവരെ വാഗമണ്‍ പോകാത്ത നീ പെണ്ണുകെട്ടിയപ്പോള്‍ എന്നെ ഉപേക്ഷിച്ചോ എന്നു ചോദിച്ചു മദ്യപരദേവത കോപിക്കുമോ എന്ന ഭയത്താലായിരിക്കാം അവന്‍ അതു കരുതിയത്. തണുപ്പോക്കെ ആയതിനാല്‍ ഭാര്യമാരോടു ചോദിച്ചാല്‍ അവര്‍ വേണമെന്നെങ്ങാനും പറഞ്ഞാലോ എന്ന പേടിയാല്‍ ഞങ്ങള്‍ പെട്ടെന്നു തന്നെ ആ പൈന്റിന്റെ കഥ കഴിച്ചു.
വാഗമണിന്റെ ഏറ്റവും ചെങ്കുത്തായ ഭാഗത്തു നിര്‍ത്തി ഞങ്ങള്‍. താഴെ ഭീകരമായ കൊക്ക. കാറ്റടിച്ചു കൊക്കയില്‍ പോകാതിരിക്കാനായ് കലുങ്ക്. അരണ്ട വെളിച്ചം, കൊടും തണുപ്പ്. ഞാന്‍ പതുക്കെ കലുങ്കിന്റെ അടുത്തു ചെന്നു. താഴേക്കു നോക്കി. കാര്‍മേഘപ്പുതപ്പില്‍ നിന്നും ഒളിഞ്ഞുനോക്കിയ ചന്ദ്രന്റെ വെളിച്ചത്തിലും കൊക്കയുടെ അടിഭാഗം കാണാന്‍ സാധിക്കുന്നില്ല. നാലഞ്ചു മീറ്റര്‍ അകലേ നില്‍ക്കുന്ന അവര്‍ 3 പേരും എന്നെ ശ്രദ്ധിക്കുന്നില്ല. ഞാന്‍ സൂക്ഷിച്ചു കലുങ്കിനു മുകളില്‍ കയറി. ആഞ്ഞു വീശുന്ന കാറ്റിനു കീഴ്പെടാതിരിക്കാനായി ഞാന്‍ 90 ഡിഗ്രിയില്‍ നില്‍ക്കാതെ 75 ഡിഗ്രി ടുവേര്‍ഡ്സ് റോഡിലേക്കു ചെരിഞ്ഞു നിന്നു.
എന്റെ ചക്കരേ....ഓടിവരൂ പൊന്നേ....നമുക്കു ടൈറ്റാനിക്കില്‍ റോസും ജാക്കും നില്‍കുന്നപോലെ ഇവിടെ നില്‍ക്കാം. ഓടിയെത്തി അവള്‍, ചാടിക്കയറി എന്നെ കെട്ടിപുണര്‍ന്നു. കാറ്റില്‍ പറന്നു കളിച്ച അവളുടെ സാരിയയാല്‍ എന്റെ കാഴ്ചമറഞ്ഞു. ഞാന്‍ റോഡാണെന്ന ഉദ്ദേശത്താല്‍ ചാടിയതു റോഡുതന്നെയായിരുന്നു. എന്നില്‍ നിന്നും ഒരു ദീര്‍ഘശ്വാസം ഉയര്‍ന്നു പൊങ്ങി.
അവള്‍ ഒരിക്കലും അവിടെ കയറും എന്നു ഞാന്‍ സ്വപ്നത്തില്‍ പോലും വിചാരിച്ചിരുന്നില്ല. മാത്രവുമല്ല, എന്റെ സാഹസിക പ്രവര്‍ത്തനങ്ങള്‍ കണ്ട് കൂട്ടുകാര്‍ ഒക്കെ ഭയപ്പെട്ട് എന്നെ അതില്‍ നിന്നു പിന്തിരിപ്പിക്കുമ്പോള്‍ ഞാന്‍ ചെയ്യാന്‍ സാധിക്കാത്ത കാര്യങ്ങള്‍ വരെ അവര്‍ എന്നെ പിന്തിരിപ്പിക്കും എന്ന ഉത്തമ വിശ്വാസത്താല്‍ ചെയ്യാന്‍ ശ്രമിക്കുകയും അവര്‍ പിന്തിരിപ്പിക്കുകയും ചെയ്തിരുന്നു. ഇവളെ ഞാന്‍ ഇനി എങ്ങനെ പേടിപ്പിക്കും, ഞാന്‍ ധൈര്യവാന്‍, സാഹസികന്‍ ഒക്കെ ആണെന്നു അവളെ കാണിക്കാനായി ചെയ്യുന്നതെല്ലാം എന്നെക്കാളും ധൈര്യവും സാ‍ഹസികതയും അവള്‍ക്കാണെന്നു തെളിയിക്കാനാണല്ലോ ഉപകരിക്കുന്നത്.
എന്തായാലും എനിക്കു മനസിലായി, ഇനി ഇത്തരം കാര്യങ്ങള്‍ ശ്രമിച്ചാല്‍ ഞാന്‍ അവളുടെ പിറകിലാണു എന്നവള്‍ക്കു മനസിലാകും. പിന്നീട് ഇന്നു വരെ ഞാന്‍ അവളുടെ മുമ്പില്‍ ആളാകാന്‍ ശ്രമിച്ചിട്ടില്ല. ഞാന്‍ പിന്നീട് ചോദിച്ചു, എന്തു ധൈര്യത്തില്‍ ആണു നീ അവിടെ കയറിയതു എന്ന്. ഞാന്‍ പറഞ്ഞാല്‍ തഴോട്ടു ചാടാനും അവള്‍ റെഡിയാണെന്നു പറഞ്ഞു. ഇന്നെനിക്കറിയാം, അവളതിനും റെഡിയാണ്, എന്നെ അത്രക്കിഷ്ടമാണ്.

Read more...

Jaalakam

ജാലകം

About This Blog

Lorem Ipsum

  © Blogger templates Inspiration by Ourblogtemplates.com 2008

Back to TOP